Літаратурная гасцёўня “Паэзія – музыка слоў”
21 сакавіка – Сусветны дзень паэзіі. Упершыню гэта свята, зацверджанае ЮНЕСКА 15 лістапада 1999 года, было адзначана ў 2000 годзе ў Парыжы. Гэты дзень садзейнічае развіццю паэтычнага слова, падтрымлівае моўную разнастайнасць і традыцыі паэтычных чытанняў.
Паэзія — гэта, напэўна, адно з самых геніяльных дасягненняў чалавецтва. Яна аб’ядноўвае краіны, народы, культуры і дапамагае людзям зразумець адзін аднаго. На працягу стагоддзяў думкі і пачуцці, апранутыя ў паэтычную форму, пранікаюць у сэрцы людзей, нагадваючы, што мы ўсе адна вялікая сям’я і што мы, такія розныя, на самай справе вельмі падобныя адзін да аднаго.
Сёння, 21 сакавіка, усіх аматараў паэзіі дзяржаўнай установы адукацыі “Сярэдняя школа №41г.Магілёва” сабрала літаратурная гасцёўня “Паэзія – музыка слоў”. Прысутныя пазнаёміліся з гісторыяй узнікнення свята. Гучалі вершы-прысвячэнні паэзіі Максіма Танка, Леаніда Галубовіча, Пімена Панчанкі. Вучні чыталі любімыя вершы беларускіх паэтаў, такія шчырыя, пранікнёныя, такія незвычайна добрыя, зразумелыя. Цёплым ручайком цяклі вершы, прысвечаныя роднай мове, радзіме, каханню.
З задавальненнем слухалі навучэнцы вершы сваіх равеснікаў — пачынаючых паэтаў, якія раней прынялі ўдзел у конкурсе “Спроба пяра”. Дарэчы пераможцам гарадского конкурсу юных паэтаў “Спроба пяра” стала вучаніца 7 “Б” класа Маргунова Дар’я. Яна ўзнагароджана дыпломам І ступені.
Напрыканцы літаратурнай гасцёўні “Паэзія – музыка слоў” прагучала думка, што кожны чалавек можа асабіста спасцігнуць яе таямніцы, але для гэтага трэба быць чуйным, назіральным, адкрытым душой. Пісаць вершы дадзена не кожнаму, бо, паводле выказвання М.Багдановіча: “душа ў паэта, калі спараджае ён дзіўныя вершы, нябесным агнём абагрэта…”. Але навучыцца разумець вершы, адчуваць прыгажосць самога жыцця можна. Гэтаму і вучыць нас паэзія.
Настаўнік беларускай мовы і літаратуры Аўчыннікава Л.В.
