Каб жыло беларускае слова

Мы жывём у адной з самых прыгожых і мірных краін свету. Людзі нашы добразычлівыя, працавітыя і таленавітыя. А мова наша — адна з самых меладычных і мілагучных. Яе гучанне нібы гукі ляснога ручайка у зацішы векавых добоў. Аднак, на жаль,у паўсядзённым жыцці мы не часта чуем размову на роднай мове. Каб гэтая сітуацыя змянілася у лепшы бок, для фарміравання асабасна значымых матываў вывучэння беларускай мовы сістэматычна праводзіцца праца з вучнямі 3”В” і 3 “Г” класаў нашай школы.

Распрацавана серыя заняткаў па розных сферах, з якіх і складаецца жыццё чалавека: музычна-забаўляльныя праграмы (“Калядкі”, “Масленіца”, “Гуканне вясны”, “Соракі” і іншыя, літаратурна-пазнавальныя мерапрыемствы ( “Каб мова родная гучала”, “Турнір юных мовазнаўцаў”, “Прыказкі і прымаўкі мудрасць народа ўвабралі” і г.д.), агляд – парады (“Мой любы горад Магілёў”, “Мінск – сэрца Беларусі”, “Знаёмыя і незнаёмыя куткі роднай зямлі”), экалагічныя гадзіны (“Па старонках Чырвонай кнігі”, “Запаведныя мясціны Беларусі”, “Зямля блакітных рэк і азёр”), кірмашы (“Беларуская кухня”, “Рамяство беларусаў”, “Спадчыну не забываем – прыгажосць ствараем”), а таксама вусныя часопісы, сюжэтна – ралявыя гульні, экскурсіі выхаднога дня.

У час гэтых мерапрыемстваў дзеці з захапленнем акунаюцца ў атмасферу традыцыйных народных свят нашых продкаў, з радасцю ўдзельнічаюць ў міні-інсцэніроўках, з вялікай цікавасцю прымаюць ўдзел у віктарынах і конкурсных праектах, якія складаюць як самастойна, так і з дапамогай бацькоў.

Безумоўна, усё гэта спрыяе выхаванню нацыянальнай свядомасці і насычае сэрца цеплынёй да роднага краю.

Базылева Любоў Віктараўна,

Козырава Таццяна Васільеўна, настаўнікі пачатковых класаў